Ruben bloggar frå turar, innland og utland: Blogginnlegg på (ny)norsk

Sundag 11/5-14

Det har vore lite med blogging den siste tida, og det er forskjellige grunnar til det. For litt over to veker sia fekk eg besøk frå Gudmor Sissel som kom flygande heilt frå Oslo. Ho hadde med seg mykje snadder frå Noreg, bl.a. brunost, bringebærsylte, honning, makrell i tomat, leverpostei, sjokolade og ikkje minst grovbrød! Delar av dette er blitt konsumert av fleire nordmenn i Lusaka den siste tida.

Sissel er ei engasjert gudmor som tek oppgåva si seriøst, me har så langt vore i 7 land ilag (Spania, Estland, England, Sør Afrika, Seychellene, Zambia og Zimbabwe) og ho passar på me dei få gongene eg ikkje passar på ho. Dama er i 50 åra, men du trur ikkje det etter å ha vore med ho, ettersom ho oppfører seg som ein 20 åring (eller 14 åring?). Det er uansett alltid livlige sprell med denne ungsinna dama.

Når ho kom fredag den 25.april serverte vertsfamilien min ein ekte zambisk middag med larvar og småfisk (katapillars og kapenta) saman med nshima, der alt skal etast med hendene. Dette var nok ein stor opplevelse for ho (det var det iallefall for meg, første gongen eg åt den maten).

Dagen etter var me i bryllup (trur det er mitt 3. eller 4. bryllup eg opplever i Zambia) og eg er glad for at endå ein nordmann fekk oppleve eit ekte afrikansk giftemål. Sundag dro heile familien på gudsteneste, min første gudsteneste sia slutten av november. Eg nytta sjangsen til å gå opp for å takke familien for alt det dei har gjort for meg dei siste 9 månadane, Sissel nytte høve til å takke familien ho også. Sundags ettermiddagen blei brukt til å besøke eit lokalt marked like før det blei mørkt og så svinge rundt på naboungane som elskar å leike med meg.

Måndag tok eg og Sissel bussen til Livingstone (etter mykje styr med utsjekkinga på hotellet ho budde på) og på vegen kom eg på at eg hadde gløymt passet mitt i nattbordsskuffa, ettersom me skulle forflytte oss til Zimbabwe to dagar seinare blei det litt stress, men eg fekk vertsfaren min til å sende passet med bussen dagen etterpå.

I Livingstone møtte me Anja, som hadde vore på ferie i ca ei veke i førvegen. Me dro ut til Victoriafallene for å sjå på dei enorme fossane, og me blei kliss gjønomblaute, kort sagt: ei fantastisk oppleving! Etterpå tok me taxi til Royal Livingstone, som er eit luksushotell like ved fossane, der såg me ei nydleg solnedgang med noko kaldt å drikke på. Dei to flottaste solnedgangane eg har sett i Afrika i år er på Lions Head i Cape Town, og ved Victoria Falls i Livingstone. På onsdagen gjekk me over grensa til Livingstone og tilbragte ein dag i byen Victoria Falls, der fekk me sjå fossane frå den andre sida, det var ein ny opplevelse (å sjå Victoriafallene frå Zambia sida var best). Torsdag tok me buss kl 07 til Harare (via Bulawayo) i ein luksusbuss, setene kunne nemleg lenast bakover og me fekk servert sandwich og vatn/brus. Eg brukte reisa på å lese i boka «Bravo Two Zero» av Andy McNab som eg fekk av Sissel. Når me kom fram til Harare kl 21:30 møtte me Helene og Anita, som også er idrettsfredskorpsere (i Livingstone og Kabwe/Lusaka). Alle oss fem delte eit familierom på Bronte Hotel.

I Harare var det arrangert ein «kunst» festival , og me kom akkurat tidsnok til å få med oss dei siste 3 dagane. Fredag såg me ein kanadisk gitarist spele framfor ca 200 tilskodarar og me brukte soldagen på å gå rundt omkring festivalområdet som bl.a. er sponsa av den Norske Ambassaden. Anja fann ein imidlertidig hobby ved å flette håret til oss andre samtidig som me koste oss med kald drikke. Laurdag var me på litt forskjellige forestillingar, Sissel og Anja såg ein klasisk Bach-forestilling, medan eg seinare var på stand-up med Anja og Anita samstundes som Sissel og Helene var på andre forestillingar. På kvelden såg jentene på danseforestillingar medan eg tok ein roleg kveld og leste ut boka mi. Sundag morgon dro Helene tilbake til Livingstone med buss, og Sissel fløy tilbake til Oslo på ettermiddagen, så første halvdelen av dagen blei brukt til soling ved bassengkanten. Eg, Anita og Anja blei verande i Harare til tysdag, og me fekk med oss avslutningsshowet sundag kveld, og det var ein flott fest. Mange gode band og bra liv. Måndag blei brukt til meir jobbing med hudfargen og nedkjøling i bassenget, samt kjøp av bussbillett heim til Lusaka. Tysdag morgon dro me nemleg tilbake til Zambias hovudstad, les meir om den på denne bloggen (Anjas blogginnlegg om bussturen)

Bilder og innlegg av HIFA festivalen finn du på Anita sin blogg: Anitas blogg

Vel heime etter ein lang, svett og slitsom busstur var det godt å vere tilbake til vertsfamilien min. Tilbake på jobb kom eg igang med siste eksamensoppgåva, og sjølv om den skal leverast inn 6.juni har eg lyst å bli ferdig med 2/3 av den innan 17.mai. Laurdagen blei også brukt til eksamensoppgåva på ein nettcafe i fred og ro.

I dag, sundag, starta eg dagen med ei treningsøkt før eg brukte resten av dagen ved ein bassengkant med Anja og Anita.

Neste veke blir nok den meste av tida brukt inne på kontoret før feiringa av nasjonaldagen brakar laus til helga. Dei norske frivillige i Livingstone kjem på onsdag/torsdag, så då blir helga brukt ilag med dei. Ønskar alle ei god veke!